کۆچی ناوادەی هونەرمەند عەتاسەلیمپوور
کۆچی ناوادەی هونەرمەند عەتاسەلیمپوور
کۆچی ناوادەی کاک عەتا سەلیمپوورم لە تۆڕە کۆمەڵایەتییەکاندا بینی و، بەڕاستی بووە هۆی خەم و پەژارەیەکی قووڵ لە هەست و دەروونمدا.
ساڵانی ساڵە کاک عەتام دەناسی و لەگەڵ ئەوەی قەت لە نزیکەوە بە دیداری شاد نەببووم، بەڵام مرۆڤێکی ژیر و بە توانا و رۆشنبیرم دەهاتە بەرچاو. خاوەن دڵێکی میهرەبان، رەفتار و گفتێکی نەرم و بەگشتی مرۆڤێکی لەبەر دڵان بوو.
کاک عەتا لەگەڵ ئەوەی کەم ئەندام بوو و، ژیانێکی دژواری بەسەردەبرد، بەڵام هەمیشە بە ورە و ئازا بوو و قەت ئەم کەمایەسییە ئەندامییە نەیهێشت لە کار و چالاکییە هونەرییەکانی بکشێتەوە. ئەو سەرەڕای بەربەستە جەستییەکان، نموونەی تێکەڵ کردنی هونەرمەندانە و بوێرانەی ژیان و ماندوو بوون بوو.
ئەو شانازیەم پێ بڕا کە ئامادەکردنی وێنەی سەر بەرگی دوو کتێبی خۆم، دوو کۆمەڵە چیرۆک بە ناوەکانی ‘سەرۆک‘ و ‘پەڵەی لیخن‘ بەم مرۆڤە بەڕێز و هونەرمەندە بسپێرم و بەرهەمێکی شیاو لەلایەن ئەم خۆشەویستەوە وەربگرمەوە.
پڕ بە دڵ سەرەخۆشی لە کەس و کاری کاک عەتا و هەموو ئازیزان و خۆشەویستانی دەکەم و، هیوای سەبووری و ئارامیان بۆ دەخوازم.
یادی هەر مان!
فەڕۆخ نێعمەتپوور
وەڵامێک بنووسە